有關金獅弄球穴的故事，是十寡年前在網路上揣著一个堪輿的網站，伊內底是佇咧紹介樹林獅頭山（樹林第三公墓）頂一門稀奇的風水，仝一个網站內有四頁攏是文字的小圖片，佮放大來看，字已經淡薄仔霧去。遮四頁佮湊起來，就是王旺發達的過程。這个網站有𪜶在獅頭山頂觀摩這門特別的墓的相片。當時，我會當確定這陣人並毋知𪜶咧研究的家族人物，在樹林濟安宮的石碑攏有看見，我當時嘛有留言，講濟安宮會當看著遮的人物。
這四頁鬥起來的故事，有一寡鋩角是無講詳細。經過了欲十年，頭一擺聽著有人講起王阿旺的故事，猶毋過他講的故事人物攏鬥毋著，但是他講著一件代誌，點破了我十年來的困擾。
王阿旺的故事有一部分是有史料可證明的，袂使當作是譀古、歕雞胿的故事來看。這幾年來，只有真少的機會會當共人講起遮爾仔精彩的故事，這馬趁著語音導覽將遮的內容整理出來，向望閣較濟人會當知影樹林的代誌。
金獅紅酒香
——樹林王旺家族發達的故事(台語文)
一、霧罩潭底埤
故事的起頭，愛對潭底的南爿，有一粒小山頭叫做「獅頭山」講起。佇咧獅頭山山跤有一个真誠大的水窟仔，叫做「潭底埤」。古早時陣的人對長山來到台灣開墾，𪜶對淡水河口靠著北風，划著帆船來到海山莊，換座小船來到潭底埤上岸開墾。
有一名叫做「王阿打」的長工，擔著擔仔，綴著一位長山來的，人稱「廖鳳山」的地理仙，已經佇遮附近的山頭走揣了幾若冬落。每年的秋天，廖鳳山就來北台灣替一位大地主走揣好的風水，這幾年攏是王阿打來發落地理仙的生活徛起，因為，廖鳳山與王阿打兩人攏嘛真好開講的人，幾年落來，𪜶兩人的交情嘛誠好了。
二、霧散金獅現
就在有一工的透早，潭底埤起了大雺霧，王阿打綴在廖鳳山的後面，𬦰上山路，來到獅頭山山頂，廖鳳山指著面前一片的菅芒，叫王阿打共刜掉。這時，雺霧漸漸散去，地理仙看著眼前的景緻，趕緊提出羅經，轉來踅去，𬦰懸閣𬦰低，經過了半个時辰，廖鳳山大大嘆了一口氣說，走揣了遮爾濟年，難得有眼前遮爾好的風水，不過，不是恁主人要的，這和伊無緣啦，長工聽了霧煞煞問講，仙的，這是按怎講。廖鳳山說，有法度葬在此的人，他的子孫金錢是趁袂完，這是地理界罕有的「金獅弄球穴」，只不過，遮門風水有真重的煞氣，若無「枉死者」是沒法度來壓住這個煞，只要壓的牢這個煞氣，才會致蔭子孫。長工王阿打聽了地理仙的解說，將遮的話記佇咧心肝底。日子到了舊曆年前，廖鳳山轉去長山，王阿打轉去主人的田園繼續他的穡頭，他看著囝兒綴著他，過著長工的生活，是欲到佗一工，才會出頭天咧。
三、提命壓煞為子孫
有一工王阿打𤆬著他的後生王阿旺來到獅頭山抾柴，兩个人來到地理仙發現的這個好風水前，王阿打佮伊聽著个代誌，攏佮𪜶後生王阿旺交代一遍，閣問王阿旺敢有聽清楚。
過了幾年，王阿打看到家己的囝兒序細一工一工長大，尤其是王阿旺已經要成人了，敢講欲予伊个後一代繼續做一世人的長工？這一暝，王阿打決定要用他的命來壓住那個煞氣，向望遮的囝兒會當有一个好的將來。隔工透早，王阿旺發現阿爸已經吊脰死了，厝邊頭尾攏講王阿打一世人做長工，拖磨厭世。王家共王阿打葬在獅頭山頂地理仙所講的穴上，就按呢又閣過了兩冬。
廖鳳山又閣來到海山潭底庄為主家走揣好的風水，這時陣才知道王阿打的代誌，他撥工去長工𪜶厝佮看覓。廖鳳山來到潭底這位長工的徛家，在伊面前的是王阿旺和他的小妹，兩人看起來是真有教養的人，猶毋過生活的困苦帶來真大的折磨，廖鳳山叫王阿旺𤆬他去王阿打的墓，兩人來到獅頭山頂的墓前，廖鳳山一眼就明白為何王家至今猶原無法度翻身，他佮王阿旺講，恁老爸的墓葬不對位囉，不要緊，隔幾工有一個好的日子，我來將恁老爸的墓徙來頂面，這字條內底的物件，你這幾工攏愛攢好。
四、金獅弄球穴開靈
這一工，潭底埤又閣起大雺霧，王阿旺擔著地理仙交代的物件來到山頂，廖鳳山在時辰到了時，叫王阿旺將檀香攏點起來，一時間歸個獅頭山頂攏是白雺雺，是檀香抑是雺霧已經分不清了。經過了幾個時辰，廖鳳山和王家總算將王阿打的墓葬入了金獅弄球穴內。地理仙廖鳳山共王阿旺講，「金獅弄球王字穴，葬後財寶頃時來。」你閣來要把握每一個機會認真打拚，將來發達的時才來答謝我。此時王家的運途因為王阿打壓在這個穴上，家運已經開始踅振動囉。
五、王謙發紅酒飄香
王阿旺把握每一個機會，對小生意一直做甲激酒的事業，王家真誠無仝款囉，這位廖鳳山那來台灣，王阿旺必定請來家中做客，等甲地理仙欲轉去長山的時，王阿旺會請人幫地理仙擔兩擔王阿旺送乎廖鳳山的禮，一路送到江西贛州三僚的廖府，聽說這個禮足足有五百兩銀，而且只要王阿旺知影廖鳳山有來台灣，他一定攏是遮的禮數送到廖府，一直甲無聽見廖鳳山來台灣的消息....。
六、石碑留名傳後世
潭底王家的事業經過一二十年來的發展，好名聲已經透甲歸的海山地方，就連彼時的庄長黃純青馬來招王阿旺合股開酒工場，後來日本政府雖然甲酒廠徵收，這時潭底王家的事業連帶在內已經有茶、米、糖、雜貨、房地產等等，王家的子弟在地方是一個比一個閣卡有才情。日本時代咱地方的大廟濟安宮對潭底要遷徙起新廟的時陣，庄長為了經費來拜託王阿旺，王阿旺知道這件代誌，就佮𪜶小弟王阿成，和後生王土龍叫來和庄長參詳起新廟的代誌，潭底王家兄弟個人攏寄附大筆的金額，遮攏刻字在「寄附芳名」石碑頂面。你若對廟的虎爿行出廟門，你馬會當看著「王謙發會社」大大字刻佇石堵頂仔，這是攏看現現的代誌，袂當嘐潲的。不過，可惜王阿旺等不著大道公入新厝就過身囉。王阿旺的後生王土龍，辦𪜶老爸的後事時，共辦喪事的錢攏捐出來予鶯歌庄，來幫助一寡散食人。
潭底王家在樹林的發達，王阿旺對一名長工的囝拍拚起，會使講一步一腳印，到了國民政府時代，王家已經出一位樹林鎮長叫做王連喜。